Ulster-Scots

Innin

Tha Polis Pleen Redder fur Norlin Airlan bes Doc Michael Maguire.

Tha Polis Pleen Redder’s Offys gies scowth an aiven-hannit fennin fur reddin pleens agin tha polis.

We tak a sicht o tha pruif furtae desarn gin polis offysers haes guidit thairsel wycelike or no.

Forbye, we leuk intil pleens agin a feck o, bot no aa, tha ootbye yins fee’d wi tha polis.  This taks in fee’d yins ’at cairries oot waard or convoyin ontaks fur tha polis.

We cum tae oor desarns aathegither scowth frae tha polis, govermin an yins makkin pleens.

Ye dinnae hae tae pye tae mak pleen tae iz.

Tha Polis Pleen Redder pits throu-hans pleens agin:

  • Tha Polis Core o Norlin Airlan (polis offysers an a wheen o tha wark-ban o tha polis)
  • Kintrawide Laa-brakkin Agentrie offysers in Norlin Airlan
  • Tha Bilfawst Shore-owersicht Polis
  • Tha Bilfawst Warlwide Drome Polis
  • Tha Männystrie o Bordèr-fennin Polis in Norlin Airlan
  • Incummer offysers an a nummer o gaugers (“sayrious cases" thair lane) in Norlin Airlan

We leuk intil pleens anent whut wye polis offysers an fee’d yins daes thair wark.  This taks in pleens anent tha uisin o owerlie garrin, ’at offysers haes mïssed tae speir intil a maittèr;  ’at offysers or yins frae thair darg-ban haes bin unco or scunnèrsome, or haes guidit thairsel in a menseless gate in ither wyes.

Whut wye tae mak a pleen

Ye’ll can mak a pleen

  • ower tha langbl’r oan 0300 123 2989
  • wi l-póast – complaints@policeombudsman.org
  • bi wye o oor wabsteid
  • wi scrievin til tha bakkin at tha fit o this blaud
  • wi lannin intil oor offys atween 9 o’ tha moarn an 5 i’ tha eftèrnuin, Monday tae Friday (ableeged gin ye’d caa 0300 123 2989 furtae mak tryst wi’z)

* Thair micht weel be a recoardin taen o whut's sayed on tha phoan tha wye  we can baith can be bieldit, an fur lairnin an ither leesome ettlins.

We’d be ableeged gin ye’d gie us aa tha wittins ye can anent tha ootfa ye’r makkin pleen o, takkin in thïngs tha like o:

  • tha day, oor, date an richt bït whar thar wus tha ootfa
  • whut the’ caa tha offyser or yin frae tha darg-ban yokkt intil’t, an thair shoodèr nummer an tha leuk o thaim
  • whut the’ caa onie yins remairkin whut cum aboot, an thair bakkin an langbl’r nummer
  • tha registratin nummers o onie motors ’at wus yokkt intil tha ootfa
  • onie ither helplie or effeirin pruif, tha like o leknesses or soon or video recoardins

Dinnae fash yersel gin ye’ll can gie nae mair nor a feck o this wittins.  We’r fur ettlin at fynnin whutiver wittins we reck tae be effeirin til yer pleen.

Ye maun mak yer pleen athin a towmond o tha ootfa ye’r taen wi.

In by-ordnar sets, tha Polis Pleen Redder micht desarn oan leukkin intil a pleen anent whut happent ye mair nor a towmond afore we haed wurd o’t.  This wud be tha wye o’t whanivver tha Polis Pleen Redder trows tha pleen tae be sair or past ordnar.

Gin ye’r ablow 18 yeir auld ye’ll can fynn oot mair aboot makkin a pleen wi knickin here

Whut ir we fur daein wi yer pleen?

We’r fur mintin tae tak rinnins anent yer pleen an syne takkin thocht o whut wye tae redd it.

We’ll lat ye ken wha’s pittin yer pleen throu-hans an gie ye aa tha wittins we’r fit tae gie at ilka stent o tha pleens patent.  We’ll dae tha jonick aiven-hannit wi yins makkin pleen an wi polis offysers.

Gin yer pleen’s anent a maittèr ’at’s no jaist as sair, we micht leuk yer complutherin wi raxin it ower tae tha polis fur thaim tae redd.  Gin ye compluther, syne tha polis wull awn wi ye furtae hae a collogue anent yer pleen an ettle at cummin til a reddin.  We’ll owergang whut wye tha polis haes pit yer pleen throu-hans.

Gin we yokk til an approbatit speir intil yer pleen we’ll gaither pruif anent whut happent ye.  This wull tak in spaiks frae yins ’at remairked it, an micht tak in polis recairts, video recoardins, polis wireless ootpit, doactèr’s recairts, forensic pruif an ither wittins.

We’r fur pittin yer pleen throu-hans gye an quïck;  a feck o tha pleens is richt an fykie, bot, an micht tak in a wheen o ither fowk, tha like o yins remairkin whut happent ye, doactèrs or the forensic darg-bann.  This micht cud weer til it takkin a richt while tae leuk intil yer pleen.

Eftèr ye hae pit in yer pleen we micht hae tae speir at ye agane fur mair wittins.  Gin we dae’t, we’ll no can fordèr a speir athoot ye haudin til niborin wi iz.

Whut we’ll no can dae

Thar’s a wheen o pleens we cannae pit throu-hans.

We’ll no can:

  • Gae intil pleens anent a polis offyser ’at’s no at thair day’s darg, less it’s tae tha purpose ’at he or she warks fur tha polis, fur patron gin the’ lat see thair waarant caird or lat oan the’r a polis offyser
  • Gae intil pleens anent yins fee’d bi tha polis ’at’s no at thair day’s darg
  • Gae intil pleens anent maittèrs adae wi tha oweraa warkin o tha polis, tha like o tha monie polis offysers haes tha ontak o yer airt, tha rankins tha polis gies thair wark, or whut wye the’ guide thair wye o warkin
  • Gae intil pleens anent waardens in chairge o pairkin
  • Gae intil pleens anent lowsed polis offysers or yins fee’d wi tha polis, oot-takkin ye’r mintin ’at the’ bruk tha laa whanivver the’ wur warkin fur tha polis

Giein ye wurd o whut happent yer pleen

Tha Polis Pleen Redder micht cud cum tae a wheen o sindèrie desarns anent yer pleen, lippenin oan tha pruif tae han.

He micht:

  • Propone ’at the’ shud tak tha laa oan a polis offyser or yin fee’d wi tha polis
  • Propone ’at a polis offyser or yin fee’d wi tha polis shud be crubbit
  • Propone ’at a polis offyser or yin fee’d wi tha polis shud hae mair prenticin
  • Gie mintins tae tha polis furtae fordèr tha wyes the’ wark
  • Cum tae a desarn ’at thar’s no eneuch pruif furtae uphaud yer pleen

Wurd proponin ’at the’ shud tak tha laa oan a bodie is gien til tha Patent Pursuin Fennin.  It bes tha ontak o the Guidèr o Patent Pursuins tae desarn wull the’ tak tha laa oan thaim.  Gin tha Guidèr cums tae tha desarn tae pursue, we’ll insense ye intil whut wye this throch-pittin warks.

Wurd allooin a bodie shud be crubbit is gien til tha Heid Offyser.  Gin the’ cum til a desarn tae crub an offyser or a bodie fee’d wi tha polis, we’ll insense ye intil this throch-pittin.

Nae mettèr aboot tha ootcum, we’ll senn ye a lettèr whanivver reddin yer pleen is aa by, furtae pit ye ower tha desarn o tha Polis Pleen Redder.

We thïnk weel o yer thochts

We’r aye ettlin at fordèrin tha fennin we aise.  Ye’ll can mak an inpit wi fïllin in an sennin bak tha speirins tae see ir ye suitit ’at we’ll pit oot til ye at tha enn o tha pleens patent.  Tha thochts o bodies ’at uises tha fennin gien wi tha Offys recks gyely wi iz an forehan haes weered tae fordèrin in tha fennin we ootpit.

Gin ye’r no suitit wi tha fennin we gie

Gin ye’r leukkin tae mak a pleen anent tha fennin ye’r gien, ye may scrieve til Petitor Pleens at tha bakkin at the fit o this blaud.  We’ll gae intil yer pleen an senn ye a scrievit repone.

Gin ye trow oor repone daesnae richt yokk til yer fashes, tha lettèr ye’ll hae wull pit ye ower whut wye ye’ll can leuk remead agin tha desarn.

Twitter home